«Հայաստանի Հանրապետության լեգիտիմ խորհրդարանի կողմից ընդունած սահմանադրական փոփոխությունները չճանաչելը ոչ միայն հանցագործություն է, այլև ուղղակի ապացույց, որ այս անդամներն այս գործում կողմնակալ են և որևէ կերպ չեն կարողանալու օբյեկտիվ հիմունքներով քննել հարցը»,- անդրադառնալով Սահմանանադրական դատարանի անդամների տարածած հայտարարությանն ասաց «Իրավունքի Եվրոպա միավորում» իրավապաշտպան հասարակական կազմակերպության նախագահ Լուսինե Հակոբյանը։
Ըստ Լուսինե Հակոբյանի պետք է ՍԴ-ի անդամների նկատմամբ հարուցվի քրեական գործ և քրեական հետապնդում, եթե հանկարծ ՍԴ-ի մոտակա նիստին ուժի մեջ մտած սահմանադրական փոփոխությամբ թոշակի անցած անդամները գնան և փորձեն մասնակցել նիստին։
Հիշեցնենք, որ հունիսի 22-ին ԱԺ-ն ԱԺ-ն երկրորդ ընթերցմամբ և ամբողջությամբ ընդունեց սահմանադրական փոփոխությունների նախագիծը, որից հետո այն ստորագրեց ՀՀ նախագահը և, ըստ ընթացակարգի, ԱԺ-ի նախագահն այն հրապարակվեց ԱԺ-ի կայքում։
Համաձայն այդ փոփոխությունների՝ հունիսի 26-ին կդադարեն ՍԴ դատավորներ Ալվինա Գյուլումյանի, Ֆելիքս Թոխյանի և Հրանտ Նազարյանի լիազորությունները, ինչպես նաև Հրայր Թովմասյանը ստիպված կլինի դադարեցնել ՍԴ-ի նախագահի պաշտոնավարումը:
Հարցին, թե ի՞նչ ազդեցություն կարող է ունենալ Հրայր Թովմասյանը՝ մնալով ՍԴ-ի դատավոր, Լուսինե Հակոբյանը պատասխանեց․ «Հրայր Թովմասյանը դառնում է ընդամենը մեկ դատավոր և, անկեղծ ասած, ճիշտ կլինի, որ այս ամենից հետո նա՝ որպես դատավոր էլ չմնա, այլ հրաժարական տա, քանի որ իր գծած սցենարով և իր հավաստիացումներով առ այն, թե միաջազգային կազմակերպություններն իրենց հետ են, որ ունեն բոլոր անհրաժեշտ ուժերի աջակցությունը և այլ, նա ապակողմնորոշեց ՍԴ-ի անդամներին, որոնք կարող էին օգտվել վաղ կենսաթոշակի սխեմայից, որն իրենց առաջարկվեց անցած տարի։ Հենց միայն այս մարդկանց ապակողմնորոշելու համար, Հրայր Թովմասյանը նույնպես պետք է հրաժարական ներկայացնի»։
Լուսինե Հակոբյանն ասաց նաև, որ ՍԴ-ից Հրայր Թովմասյանի հեռանալնը պարզապես ժամանակի հարց է, սակայն նվազագույն արժանապատվություն ունենալու դեպքում նա առաջինը պիտի հեռանա ՍԴ-ից։