Ահազանգ փաստաբանի գործունեության խոչընդոտման վերաբերյալ

Երեկ՝ ժամը 18:40-ին, փաստաբան Տիգրան Եգորյանին չթույլատրեցին մուտք գործել ՀՀ քննչական կոմիտե՝ մասնակցելու առավոտյան բերման ենթարկված “Հիմնադիր խորհրդարանի” անդամ Արամ Հակոբյանի նկատմամբ կատարվող քննչական գործողություններին: Քննչական մարմնի կողմից մերժման համար ներկայացված պատճառաբանությունը աշխատանքային օրվա արդեն ավարտված լինելն էր: Փաստաբանին խորհուրդ էին տվել վերադառնալ հաջորդ օրը: Արամ Հակոբյանի դուստրը նախօրեին Աղվան Հովսեփյանի անունով դիմում էր ներկայացրել Քննչական կոմիտե՝ պահանջելով “Իրավունքի Եվրոպա միավորում” իրավապաշտպան հասարակական կազմակերպության (այսուհետ` ԻԵՄ) անդամ փաստաբաններ Լուսինե Հակոբյանին և Տիգրան Եգորյանին ճանաչել որպես իր հոր՝ Արամ Հակոբյանի շահերի պաշտպան և ապահովել վերջիններիս ներկայությունը քննչական գործողությունների ժամանակ:
ԻԵՄ-ի փաստաբանների ահազանգով ժամը 10.00-ի սահմաններում ՄԻ պաշտպանի գրասենյակից ներկայացուցիչը այցելել է Արամ Հակոբյանի բնակարան, ով փորձել է ծանոթանալ այնտեղ ընթացող խուզարկության հիմքերին, սակայն ՀՀ ԱԱԾ-ի և/կամ ոստիկանության ներկայացուցիչներն արգելել են վերջինիս մուտքը բնակարան և հրաժարվել են ներկայացնել դատարանի որոշումը՝ պատասխանելով, որ բոլոր հարցերի պատասխանները վերջինս կարող է ստանալ ՀՀ ՔԿ լրատվության բաժից:
Նույն կերպ արգելվել է նաև Արամ Հակոբյանի շահերը ներկայացնող փաստաբան Հայկ Հարությունյանի մուտքը բնակարան: